ក្នុងសម័យនេះ ស្ទើរអាជីវកម្មមួយចំនួនធំកំពុងពង្រីកខ្លួន វិឌ្ឍន៍ចូលទៅក្នុងអនឡាញ ដើម្បីឆ្លើយតបនឹងតំរូវការរបស់អតិថិជន។ អ្នកប្រើប្រាស់Online មានការកើនឡើងយ៉ាងគំហុក ម្យ៉ាងទៀតមនុស្សម្នាក់ៗក៏គ្មានពេលគ្រប់គ្រាន់ចេញទៅក្រៅដូចពីមុនដោយសារបញ្ហាជំងឹឆ្លងកូវីដ១៩ ដែលតំរូវឲ្យពូកគេប្រុងប្រយ័ត្ន និងបារម្ភពីសុខភាព ដូចនេះម្នាក់ៗ បានឆ្លៀតឱកាសទាញយកផលចំនេញរៀងៗខ្លួន ក្នុងវិស័យនេះ។ យើងឃើញថា ការលក់ផលិតផលតាមអនឡាញ កំពុងមានសន្ទុះយ៉ាងខ្លាំងគួរឱ្យកត់សំគាល់ ដែលភាគច្រើនមាន សិស្ស និស្សិត អ្នកធ្វើការ អ្នករកស៊ី បាននិងកំពុងឆ្លៀតពេលទំនេររបស់ខ្លួនដើម្បីបង្កើនចំណូលបន្ថែម ។
ការចាប់ផ្តើមលើអាជីវកម្មតាមរយៈ Online នេះ បានផ្តល់ផលចំនេញយ៉ាងច្រើន និងមានប្រសិទ្ធភាពខ្លាំងចំគោលដៅលឿនរហ័ស ដែលនេះជាមូលហេតុដែលអ្នកគួរចាប់ផ្តើមអាជីវកម្មលើ Online ៖
1.ចំណាយទុនតិច ៖ អ្នករកស៊ីអនឡាញជាច្រើនបានចំនាយទុនតិចតួចបំផុតសម្រាប់ការទិញផលិតផលដាក់ក្នុងស្តុកដើម្បីលក់នៅលើអនឡាញ រីឯអ្នកខ្លះទៀតទៅចរចារជាមួយម្ចាស់អាជីវកម្មផ្សេងៗដើម្បីយកឥវ៉ាន់របស់គេយកទៅលក់បន្ត ដោយមិនចាំបាច់ទិញស្តុកឡើយ ។
2.ប្រាក់ចំណូលគួរសម ៖ តាមការសិក្សាជាក់ស្តែងយើងឃើញថា ផលិតផលដែលដាក់លក់ មួយឯកតាចំនេញជាមធ្យមពី ៤ ទៅ ៨ ដុល្លារ ហើយក្នុងមួយថ្ងៃអាចលក់បានចន្លោះពី ១ ទៅ ៣ ឯកតា ដោយអាចទូទាត់ការចាយវាយប្រចាំថ្ងៃបាន ។
3.ប្រើប្រាស់ពេលវេលាតិច៖ អាជីវកម្មតាមអនឡាញអាចធ្វើបាននៅពេលទំនេរពីការងារ ឬគ្រាន់តែចាំលើកទូរសព្ទនៅពេលភ្ញៀវចាប់អារម្មណ៍ចង់សួរព័ត៌មានបន្ថែម ឬបញ្ជាការកម្ម៉ុងផលិតផល ។
4.ធ្វើបានគ្រប់ទីកន្លែង៖ អាជីវកម្មប្រភេទនេះ អាចធ្វើបាន តាមហាងកាហ្វេ ម៉ាត ផ្ទះ ពោលគឺកន្លែងណាក៏ដោយឱ្យតែមានអ៊ីនធឺណេត ទូរស័ព្ទដៃស្មាតហ្វូន ឬ Laptop ជាការស្រេច ។
5.គ្រប់គ្រងការងារដោយខ្លួនឯង៖ យើងអាចរៀបចំផែនការនៃការលក់តាមការច្នៃប្រឌិតរបស់ខ្លួនឯងដោយមិនចាំបាច់ធ្វើតាមនរណាម្នាក់ ឬស្តាប់តាមការបញ្ជាពីថៅកែនោះឡើយ ។
យ៉ាងណាក៏ដោយ ការធ្វើអាជីវកម្ម មិនប្រាកដថាងាយស្រួលដូចការនិយាយ ឬសរសេរនោះទេ ប៉ុន្តែក៏មិនប្រាកដថា មិនអាចធ្វើបាននោះដែរ វាអាស្រ័យទៅលើ បុគ្គល រៀងៗខ្លួន ។ ចំណូលអាចមានកម្រិត តែប្រសិនបើយើងធ្វើវា នោះយើងនឹងអាចអភិវឌ្ឍន៍សមត្ថភាពរបស់ខ្លួនឯង ដើម្បីអាចឈោងចាប់អាជីវកម្មដែលមានចំណូលច្រើនជាងនេះបាន ៕
