មហាសេដ្ឋីវ័យ ៤៧ឆ្នាំ អ្នកជំនួញជនជាតិឥណ្ឌា-អាមេរិក លោក Sundar Pichai នាយកប្រតិបត្តិរបស់ក្រុមហ៊ុនយក្ស Google និងក្រុមហ៊ុន alphabet បានបង្ហើបពីគន្លឺះជោគជ័យដ៏ធំសម្បើមរបស់ Google សព្វថ្ងៃនេះ ពីគន្លឹះទាំង ៥ ដែលបានអនុវត្តន៍ក្នុងក្រុមហ៊ុន៖
១.គិតពីអ្វីដែលនឹងកើតឡើងនាពេលអនាគត៖ លោក Sundar បាននិយាយថា ប្រសិនបើអ្នកមិនគិតអំពីពេលអនាគតទេនោះ អ្នកនឹងត្រូវមនុស្សជំនាន់ក្រោយទាត់ចេញពីសង្វៀនជាក់ជាមិនខាន ឬនិយាយម្យ៉ាងទៀតថា មនុស្សជំនាន់ក្រោយនឹងមកដណ្តើមការរកស៊ី និងការងារដែលអ្នកកំពុងធ្វើនាពេលបច្ចុប្បន្ននេះ។ ឧទាហរណ៍ដូចជាក្រុមហ៊ុន Yahoo និងក្រុមហ៊ុន Nokiaជាដើម ក្រុមហ៊ុនទាំងពីរនេះ សុទ្ធតែជាក្រុមហ៊ុនយក្សកាលពីប៉ុន្មានឆ្នាំមុន តែដោយសារមិនបានខ្វល់ពីពេលអនាគត ទើបទទួលការបរាជ័យងើបមុខមិនរួច។ លោក Sundar បានពន្យល់ទៀតថា ដើម្បីឱ្យប្រាកដចិត្តថា អាជីវកម្ម ឬក្រុមហ៊ុនរបស់អ្នកអាចមានជីវិតយូរអង្វែងបាន អ្នកចាំបាច់ត្រូវតែបង្កើតអ្វីដែលថ្មីសម្រាប់ពេលអនាគត។
២. ផ្តល់អំណាចដល់បុគ្គលិក៖ មហាសេដ្ឋី មានទ្រព្យប្រមាណ ១.៣ពាន់លានដុល្លាររូបនេះ បានលើកឡើងថា “ប្រសិនបើអ្នកមិនផ្តល់សិទ្ធិទៅឱ្យបុគ្គលិករបស់អ្នកទេ ពួកគេនឹងមិនដាក់ចិត្តធ្វើការងាររបស់ពួកគេបានល្អឡើយ”។ ការផ្តល់អំណាចដល់មនុស្សគឺមានសារៈសំខាន់ខ្លាំងណាស់ ព្រោះវាជួយឱ្យពួកគេមិនមានសម្ពាធ និងមានភាពច្នៃប្រឌិតច្រើន ហើយអាចបំពេញការងារបានប្រសើរថែមទៀតផង។
៣. ច្នៃបង្កើតអ្វីដែលថ្មី និងផ្តល់ភាពងាយស្រួលដល់មនុស្ស៖ មេធំ Google រូបនេះ បានឱ្យដឹងថា មិនខ្វល់ថាអ្នកមកពីណា មានសញ្ជាតិអ្វីនោះទេ ការច្នៃប្រឌិតអ្វីដែលអស្ចារ្យមួយ អាចផ្លាស់ប្តូរជីវិតរបស់អ្នកពីមនុស្សក្រីក្រឱ្យក្លាយជាមហាសេដ្ឋីត្រឹមរយៈពេលមួយយប់បាន។ ការបង្កើតអ្វីដែលថ្មី និងអាចដោះស្រាយបញ្ហាមនុស្សជុំវិញសកលលោកបាននោះ គឺជាអ្វីដែលខ្ញុំ និងមហាសេដ្ឋីគ្រប់រូបចូលចិត្តធ្វើបំផុត។ ព្រោះបើអ្នកអាចដោះស្រាយបញ្ហាមនុស្សបានកាន់តែច្រើន អ្នកក៏កាន់តែជោគជ័យដូចគ្នាដែរ។
៤. ហ៊ានប្រថុយ៖ មហាសេដ្ឋីមានទ្រព្យជាង ១.៣ពាន់លានដុល្លាររូបនេះ បានអះអាងថា ជោគជ័យទាមទារឱ្យមានហានិភ័យ។ ប្រសិនបើអ្នកមិនប្រថុយប្រថានទេ អ្នកនឹងបាត់ឱកាសដ៏ធំនៅក្នុងជីវិតជាក់ជាមិនខានឡើយ។ ដូច្នេះ ដើម្បីឱ្យជីវិតរបស់យើងកាន់តែប្រសើរ ហើយដើម្បីឱ្យក្តីស្រមៃរបស់យើងកាន់តែទៅមុខនោះ យើងត្រូវតែហ៊ានប្រថុយប្រថាន ដើម្បីទទួលបានលទ្ធផលដែលថ្មី។ ហើយសូមជឿខ្ញុំចុះថា “ទ្រព្យសម្បត្តិនឹងរត់មករកអ្នក នៅពេលដែលអ្នកមានភាពក្លាហាន ហើយហ៊ានចាប់ផ្តើម”។
៥.អនុវត្តតាមក្តីសុបិន្តរបស់អ្នក៖ លោក Sundar Pichai បានសង្កត់ធ្ងន់ថា ដើម្បីឱ្យជីវិតមានភាពជោគជ័យបាន អ្នកត្រូវតែមានក្តីស្រមៃ ហើយក្តីស្រមៃនោះត្រូវតែធំ ហើយជាក្តីស្រមៃដែលជួយដោះស្រាយបញ្ហារបស់មនុស្សបានច្រើនបំផុត ជាពិសេសវាជាអ្វីដែលអ្នកចង់សម្រេច និងជាអ្វីដែលអ្នកស្រលាញ់ចេញពីចិត្ត ព្រោះក្តីស្រមៃបែបនេះ ទើបធ្វើឱ្យអ្នកមានទឹកចិត្តពុះកញ្រ្ជោល ដើម្បីសម្រេចវា ៕
