រាល់ការចេញដំណើរទីជិត ឬឆ្ងាយ អ្នកតែងតែត្រួតពិនិត្យរថយន្តជាមុនសិន ថាមានបញ្ហាអ្វីអាចកើតទ្បើងពេលធ្វើដំណើរ។ អ្វីដែលសំខាន់នោះគឺ បញ្ហាម៉ាស៊ីនរថយន្ដប្រាកដណាស់រឿងមួយដែលឈឺក្បាលសម្រាប់អ្នកទើបនឹងមានទ្បានជិះ ឬជាពិសេសស្រ្តីៗ ដែលពួកគាត់មិនសូវចាប់អារម្មណ៍ ពេលខ្លះម៉ាស៊ីនកើតមានបញ្ហា ត្រូវចូលជាងញឹកញយ ។ ខណៈនេះដែរយើងនឹងនាំអ្នកទៅដឹងវិធីសាស្រ្ដខ្លីៗ ងាយៗ ទាំង ៥ ខាងក្រោម ដែលជួយឲ្យអ្នកថែទាំម៉ាស៊ីនរបស់អ្នក និងចំនុចត្រូវយល់ដឹង៖
១. ត្រួតពិនិត្យសម្ពាធខ្យល់កង់រថយន្ត
រាល់ការចេញដំណើរទីជិតឆ្ងាយ អ្នកតែងតែត្រួតពិនិត្យរថយន្តជាមុនសិន ថាមានបញ្ហាអ្វីអាចកើតទ្បើងពេលធ្វើដំណើរ។ អ្វីដែលសំខាន់នោះគឺសម្ពាធខ្យល់កង់រថយន្តរបស់អ្នកធូរខ្លាំង ឬតឹងខ្លាំងដែរ ឬទេ? កាលណាសម្ពាធខ្យល់កង់រថយន្តធូរខ្លាំង កម្លាំងវិលនៃកង់នឹងកាន់តែតឹង ធ្វើឲ្យម៉ាស៊ីនប្រឹងខ្លាំង ជាហេតុនាំឲ្យរថយន្តរបស់អ្នកស៊ីសាំងខ្លាំង។
តែបើសម្ពាធខ្យល់កង់តឺងខ្លាំង នៅពេលជិះផ្លូវឆ្ងាយ ឬចតហាលថ្ងៃ វាអាចបណ្តាលឲ្យផ្ទុះបែក ដោយសារសម្ពាធខ្យល់ក្នុងកង់កើន ដោយសារកំដៅ ។
២. ប្ដូរប្រេងម៉ាស៊ីន
ចំនួន គីឡូម៉ែត្រអ្នកត្រូវដូរប្រេងម៉ាស៊ីនចេញម្ដង ឬ ជិះចេញតាមខេត្តឆ្ងាយៗជាដើម អ្នកអាចធ្វើតាមការណែនាំរបស់ជាង ដូចជា ៥០០០ ទៅ ៨០០០ គីឡូអ្នកត្រូវដូរប្រេងម៉ាស៊ីនចេញម្ដង ដើម្បីឲ្យប្រេងថ្មីទៅធ្វើការជាមួយម៉ាស៊ីនយើង បានកាន់តែស្រួល ។ បើប្រេងទើបនឹងប្តូរ អាចយូរៗ ពិនិត្យមើលថាតើប្រេង អាចខ្វះ ឬមិនខ្វះ ដើម្បីងាយស្រួលថែមឲ្យគ្រប់ ជៀសវាងការខ្វះ ។
៣. តម្រងប្រេង
ជាទូទៅតម្រងប្រេង ដូរចេញនៅពេលដែលអ្នកទៅដូរប្រេងម៉ាស៊ីនចាប់ពី ២ដង ព្រោះវាក៏ជួយឲ្យម៉ាស៊ីនដំណើរការមិនរអាក់រអួល និងចំរុះកំទេចក្នុងម៉ាស៊ីន ។
៤. លិច ឬជ្រាបប្រេង
ការស្រកលិចប្រេង ឬ ហៀប្រេងនោះ វាអាចបង្កជាហានិភ័យដល់ការបើកបរ ដែលមានសភាពខុសប្រក្រតី ដូចជាសំឡេងលាន់ខ្លាំង មានហៀ ឬលិចជ្រាបប្រេង ដែលត្រូវឆាប់យកទ្បានចូលជាងដើម្បីពិនិត្យ ព្រោះទុកយូរអាចនឹងអស់លុយកាន់តែច្រើន ជាពិសេសប៉ះពាល់ដល់ដំណើរការម៉ាស៊ីន ។
៥. អាគុយ
អាគុយក៏ជាផ្នែកមួយសំខាន់នៃម៉ាស៊ីនដូចប្រេងម៉ាស៊ីនដែរ បើគ្មានអាគុយ ឡានក៏មិនអាចបញ្ឆេះបានដែរ ដើម្បីធានាឲ្យម៉ាស៊ីនឡានបញ្ឆេះបានស្រួល អ្នកត្រូវចេះថែទាំ បើអ្នកឧស្សាហ៍ទុកទ្បានចោលយូរ អ្នកគួរ បញ្ឆេះទ្បានចោលទុក ៥ ទៅ ១០នាទី ដើម្បីឲ្យសាកភ្លើងចូលអាគុយ និងដំណើរការម៉ាស៊ីនបានល្អ ។ កាលណាអាគុយគ្មានភ្លើងយូរ វាអាចធ្វើឲ្យខូចអាគុយ ក្នុងករណីអាគុយចង់ខូច មិនសូវកាន់ភ្លើង អ្នកគួរប្តូរវាចេញ ជៀសវាងបញ្ឆះមិនស្រួល ៕
