ទីបំផុតនាវាទេសចរណ៍របស់អាមេរិកមួយគ្រឿងផ្ទុកមនុស្សជាង២០០០នាក់ ដែលប្រទេសនិងកោះចំនួន៦ បដិសេធមិនឲ្យចូលចតនោះ ត្រូវបានកម្ពុជាអនុញ្ញាតឲ្យចូលចតនៅកំពង់ផែខេត្តព្រះសីហនុដោយផ្អែកលើគោលការណ៍មនុស្សធម៍ ម្យ៉ាងវិញទៀត ក្នុងករណីមានអ្នកមានជំងឺ គឺត្រូវការ ការព្យាបាលមិនមែនទុកអោយនៅឯកកោឡើយ។
នាវាទេសចរណ៍ MS Westerdam ដែលមានផ្ទុកមនុស្សសរុប ២,២៥០នាក់ (ភ្ញៀវ ១,៤៥០នាក់ និងបុគ្គលិកនាវា ៨០០នាក់) ដែលបានបង្វែរទិសដៅចូលចតក្នុងកំពង់ផែផែព្រះសីហនុ ក្រោយពីត្រូវបានប្រទេសចំនួន៥ បដិសេធមិនឲ្យចូលចតជាដាច់ខាត ព្រោះមានការភ័យខ្លាចចម្លងវីរុសកូរ៉ូណា ប្រទេសទាំង៥ នោះមានដូចជា ប្រទេសថៃ ជប៉ុន កោះតៃវ៉ាន់ កោះហ្គាំ និងប្រទេសហ្វីលីពីន បន្ទាប់ពីប្រទេសមួយចំនួនបដិសេធការចូលចតដោយសារមូលហេតុខ្លាចមានអ្នកដំណើរមានផ្ទុកមេរោគកូរ៉ូណា ទោះបីខាងនាវា បានអះអាងថា គ្មានអ្នកឈឺក៏ដោយ។
នាវានេះនឹងមកដល់កំពុងផែព្រះសីហនុ នៅម៉ោង ០៧:០០នាទីព្រឹក ថ្ងៃទី១៣ ខែកុម្ភៈឆ្នាំ២០២០ស្អែកនេះ ផ្ទុកមនុស្សប្រមាណ១៤៥០នាក់ និងក្រុមនាវិក៨០០នាក់។
ភ្ញៀវទេសចរណ៍ក្នុងនាវានេះ នឹងអាចផ្ទេរការធ្វើដំណើរតាមយន្តហោះនៅកម្ពុជា ដោយមានជាតិសាសន៍ចម្រុះក្នុងនោះមានជនជាតិអាមេរិក៦៥០នាក់ផងដែរ ជាមួយគ្នានេះជនបរទេសទាំងនោះ ក៏បានថ្លែងអំណរគុណយ៉ាងជ្រាលជ្រៅចំពោះអជ្ញាធរកម្ពុជាដែលបានផ្ដល់ការគាំទ្រពួកគេក្នុងការចូលចតនៅកម្ពុជា ខណៈដែលពួកគេកំពុងខ្វះស្បៀងអាហារ និងត្រូវចាក់ប្រេងនាវា ផងដែរនោះ ៕
