ទីភ្នាក់ងារចំណីអាហារ និងកសិកម្ម(FAO) របស់អង្គការសហប្រជាជាតិបាននិយាយកាលថ្ងៃអង្គារទី ២៥កុម្ភៈថា ហ្វូងសត្វកណ្តូបវាលខ្សាច់ បានចូលមកដល់ក្នុងប្រទេសកុងហ្គោហើយ។ នេះជាលើកទី១ហើយដែលពួកសត្វល្អិតត្រូវបានគេឃើញនៅក្នុងប្រទេសអាហ្វ្រិកកណ្តាលនេះចាប់តាំងពីឆ្នាំ ១៩៤៤មក។ ទីភ្នាក់ងារចំណីអាហារនិងកសិកម្ម បានព្រមានអំពី”ការគំរាមកំហែងភាពអត់ឃ្លានដ៏ធំ”នៅអាហ្វ្រិកខាងកើត ដោយសារពួកសត្វល្អិតទាំងនោះដែលបានបង្ហិនបង្ហោចដំណាំគ្រប់ប្រភេទ ។
យោងតាមសារព័ត៌មានក្នុងស្រុកមួយ ម្សិលមិញនេះនៅថ្ងៃទី២៧ កុម្ភៈ បានឲ្យដឹងថា ចិនមានផែនការរៀបបញ្ជូនសត្វទាចំនួន ១០ម៉ឺនក្បាលទៅជួយការប្រយុទ្ធ នៅប្រទេសប៉ាគីស្ថានជាមួយហ្វូងសត្វកណ្តូបរាប់លានក្បាល ដែលបង្ហិនបង្ហោចដំណាំអ្នកស្រុកដ៏ធំនេះ ។ ការប្រើហ្វូងសត្វទា គឹចំណាយតិច និងមិនប៉ះពាល់បរិស្ថាន ដូចការប្រើថ្នាំសម្លាប់សត្វល្អិតទ្បើយ។ ទាមួយក្បាលអាចស៊ីកណ្តូបបាន ២០០ក្បាលក្នុងមួយថ្ងៃ ។
កាលពី ២ទសវត្សត៍មុន ចិនក៏បានបញ្ជូនសត្វទាទៅប្រយុទ្ធ នឹងហ្វូងកណ្តូបដូចគ្នានៅតំបន់ស៊ីនជាំងប្រទេសចិន ដោយមានប្រសិទ្ធភាពគួរសម ជាជាងប្រើប្រាស់ថ្នាំសម្លាប់សត្វល្អិត ៕
