យោងតាមរបាយការណ៍ពី The Sun បានឱ្យដឹងថា សមាជិកកីឡាកររបស់ក្រុម Juventus ទាំងអស់ កំពុងស្ថិតក្នុងការតាមដានរបស់ក្រុមគ្រូពេទ្យ និងមិនឱ្យបន្ដការហ្វឹកហាត់ទៀតនោះទេ ក្រោយពីមានកីឡាករនៅអ៊ីតាលីម្នាក់ឆ្លងមេរោគ COVID-19 ។ ខណៈដែលក្រុមយុវជនអាយុក្រោម ២៣ឆ្នាំរបស់ពួកគេទាំងអស់ ត្រូវដាក់ឱ្យនៅដាច់ដោយឡែកពីគេ ដើម្បីធ្វើការតាមដានដោយសារការភ័យខ្លាចនៃវីរុស COVID-19 ។
មានការលិចលឺដំណឹងថាកីឡាកររបស់ក្រុម Pianese បានឆ្លងមេរោគ Corona នឹងកំពុងសម្រាកនៅក្នុងមន្ទីរពេទ្យ ដែលក្រុមនេះ ក៏ធ្លាប់លេងជាមួយក្រុម U23 របស់ក្រុម Juventus ផងដែរ ហើយក្រុម U23 នេះ មានសមាជិកមួយចំនួនត្រូវហាត់ជាមួយក្រុមឈុតធំរបស់ Juventus និង Cristiano Ronaldo ជាប្រចាំតែម្ដង។
សមាជិកក្រុម U23 របស់ Juventus ទាំងអស់ដែលបានលេងជាមួយក្រុម Pianese កន្លងទៅ ពេលនេះតម្រូវឱ្យសម្រាកនៅផ្ទះមិនឱ្យចាកចេញទៅណានោះទេ។ រហូតដល់ថ្ងៃទី៨ខាងមុខ ប្រសិនបើមិនមានអ្វីកើតឡើងទើបអាចចាកចេញទៅណាមកណាបាន។ នៅអ៊ីតាលីបច្ចុប្បន្នព្រឹត្តិការណ៍កីឡាជាច្រើន បានផ្អាកបណ្ដោះអាសន្ន ខណៈដែលអ្នកឆ្លងមេរោគកើនដល់ជាង១ពាន់នាក់ និងអ្នកស្លាប់ក៏បានកើនឡើងផងដែរដោយសារមេរោគ Corona ឬ Covid-19 នេះ៕
