ប្រេស៊ីល៖ ប៉ូលីសប្រេស៊ីលបានបិទរោងចក្រផលិតរថយន្តក្លែងក្លាយម៉ាក Ferraris និងស៊េរី Lamborghini ។ គេដឹងថាកន្លែងដែលផលិតរថយន្តក្លែងក្លាយនោះ ជាកម្មសិទ្ធរបស់ឪពុក និងកូនប្រុសពីរនាក់ នៅភាគខាងត្បូងនៃរដ្ឋសាន់តាកាតារីណា ត្រូវបានចាប់ខ្លួនពីបទចោទប្រកាន់ទាក់ទងនឹងកម្មសិទ្ធិបញ្ញា។
ប៉ូលីសបាននិយាយថារថយន្ដទាំងនេះ ត្រូវបានដាក់លក់នៅលើប្រព័ន្ធផ្សព្វផ្សាយសង្គមក្នុងតម្លៃ 45.000 ដុល្លារទៅ 60.000 ដុល្លារ ដែលជាតម្លៃថោកបំផុត នៃតម្លៃពិតរថយន្តម៉ាក Ferraris និងស៊េរី Lamborghini របស់ក្រុមហ៊ុនអ៊ីតាលី។ សម្រាប់គ្រឿងបន្លាស់ដែលយកមកប្រើដើម្បីផលិតរថយន្តនោះ មន្ត្រីប៉ូលីសមិនបានបង្ហាញនោះទេ។
រូបថតជាច្រើនត្រូវបានផ្សព្វផ្សាយក្នុងបណ្តាសង្គមដែលបង្ហាញពីរូបរាងរថយន្ត ព្រមទាំងផ្លាកសញ្ញា និងគ្រឿងបន្លាស់ដែលមានស្លាកសញ្ញាអ៊ីតាលី។ ការវាយឆ្មក់ចូលទៅកន្លែងផលិតរថយន្តខុសច្បាប់នេះ បានធ្វើទ្បើងនៅថ្ងៃច័ន្ទ តាមពាក្យបណ្តឹងរបស់ក្រុមហ៊ុនអ៊ីតាលី។ រថយន្តចំនួន 8 គ្រឿងត្រូវបានរឹបអូស ហើយប៉ូលីសពួកគេកំពុងស៊ើបអង្កេតពីចំនួនរថយន្តជាច្រើនទៀតដែលត្រូវបានផលិត និងលក់ចេញ៕
ប្រភព : scmp
